Вести

Мицкоски од Куманово: Нашите предци ни ја оставија слободата, ние на нашите деца мора да им оставиме успешна држава

Претседателот на Владата, Христијан Мицкоски, денес од Спомен-костурницата во Куманово, по повод одбележувањето на 11 Октомври – Денот на народното востание, порача дека Македонија мора да продолжи да се развива како економски силна, достоинствена и успешна држава, во која младите ќе ја гледаат својата иднина. Во своето обраќање тој се осврна на историското значење на празникот, економските резултати, животниот стандард, европската интеграција, односите со источниот сосед и потребата од национално единство.

Мицкоски потсети дека пред 85 години, во Прилеп и Куманово, започнало организираното востание против фашистичкиот окупатор, кое прераснало во народноослободителна борба во која илјадници луѓе ги положиле животите за слободата.

„Денес стоиме пред историјата на еден народ кој низ вековите поминал низ премногу искушенија, премногу неправди, премрежија, но никогаш не се откажал од своето право да биде слободен, да биде свој, да има сопствен дом и сопствена држава“, истакна претседателот на Владата.

Тој нагласи дека слободата не била добиена на подарок, туку била извојувана благодарение на генерации кои имале храброст да се спротивстават на неправдата и да се борат за сопствената држава.

Според него, борците од 1941 година немале гаранција дека ќе победат, ниту сигурност дека ќе го дочекаат следниот ден, но имале идеал, вера и љубов кон татковината.

Мицкоски порача дека денешните генерации имаат обврска со истата решителност да ја градат иднината, да ги надминат поделбите и да остават посилна држава од онаа што ја наследиле.

„Нашата татковина е поголема од секоја политичка генерација“, нагласи тој, додавајќи дека државата не е само знаме, химна и граници, туку доверба, систем и ветување дека иднината на секој граѓанин ќе зависи од неговата работа, знаење и способности.

„Доста е од мали амбиции, потребни ни се големи национални цели“

Во обраќањето, претседателот на Владата истакна дека Македонија не смее да се задоволува со просечност и изгубени можности, туку мора да постави големи национални цели.

„Доста е од мали амбиции и изгубени можности. Предолго се задоволуваше со просечност. Време е да поставиме големи национални цели, да носиме храбри одлуки и да создадеме држава која нема да преживува, туку ќе напредува“, порача Мицкоски.

Тој оцени дека државата треба да создава нови успеси во економијата, институционалната правда, националното достоинство и развојот.

Во овој дел од говорот упати и критики кон политичките противници, обвинувајќи ги дека преку, како што рече, лаги, сомнежи и подметнувања се обидуваат да создадат немир и да го попречат напредокот на државата.

Според Мицкоски, државата мора да се ослободи од наталожените проблеми и да продолжи со реформите, без да се враќа на политиките кои, според неговата оценка, ја довеле во тешка состојба.

„Најголемата национална битка е битката за младите. Мора да изградиме иднина во која младите нема да избираат меѓу татковината и сопствената иднина. Земја во која ќе остануваат, ќе создаваат семејства и ќе ги остваруваат своите соништа“, истакна претседателот на Владата.

Тој рече дека секојдневно се прашува дали Владата прави доволно за подобрување на животот на граѓаните и дека е свесен за тешкотиите со кои се соочуваат многу семејства.

Мицкоски оцени дека реформите се спроведуваат во сложени услови, во време на светска криза и, како што наведе, наследен руиниран систем.

Според него, Владата вложува напори да воспостави ред, да спроведе реформи и да создаде основа за долгорочен економски развој.

Економски раст од 4,3 проценти и извоз од 5,74 милијарди евра

Во економскиот дел од говорот, Мицкоски презентираше повеќе показатели за кои оцени дека потврдуваат позитивни движења во македонската економија.

Тој наведе дека во вториот квартал од 2026 година е остварен реален раст на бруто-домашниот производ од 4,3 проценти, со номинален раст од повеќе од осум проценти.

Според неговите зборови, Државниот завод за статистика го ревидирал растот на БДП за 2024 година од три на 3,8 проценти.

Мицкоски посочи дека во 2024 и 2025 година номиналниот раст бил над осум проценти и, според неговото тврдење, највисок во регионот, а позитивниот тренд продолжува и во 2026 година.

„Тоа е показател за економија која се движи напред, создава нова вредност и отвора простор за повисок животен стандард“, рече претседателот на Владата.

Тој информираше дека извозот во првите осум месеци од годинава достигнал 5,74 милијарди евра, што претставува раст од 8,7 проценти.

Според него, овие резултати значат поголем пласман на македонските производи на странските пазари, зголемена економска активност и нови можности за домашните компании.

Просечна плата од 1.000 евра до крајот на мандатот

Говорејќи за платите и животниот стандард, Мицкоски наведе дека просечната нето-плата во јули достигнала 48.499 денари, со годишен номинален раст од 7,1 процент.

Тој најави дека целта на Владата е до крајот на мандатот просечната плата да се приближи до 1.000 евра, односно нешто повеќе од 60.000 денари.

Претседателот на Владата нагласи дека економскиот раст треба да се претвори во повисоки примања и поквалитетен живот за граѓаните.

Истовремено призна дека постојните резултати не се доволни и дека сè уште има семејства кои тешко ги покриваат месечните трошоци, млади кои бараат подобри можности и компании на кои им е потребна поголема поддршка.

„Вистински успех ќе биде кога растот на економијата ќе се почувствува во секој дом“, порача Мицкоски.

Мицкоски: Инфлацијата во Македонија расте побавно отколку кај соседите

Претседателот на Владата се осврна и на растот на трошоците за живот, оценувајќи дека Македонија во последните три месеци бележи пониска инфлација во споредба со дел од соседните земји и Европската Унија.

Според податоците што ги презентираше, во јули, август и септември трошоците за живот во Македонија растеле со стапки од 2,3 до 2,7 проценти, додека, како што наведе, просекот во Европската Унија бил над 3,8 проценти.

Мицкоски рече дека инфлацијата во септември изнесувала 2,7 проценти, додека кај јужниот сосед била над пет проценти, а кај источниот 5,6 проценти.

Тој оцени дека овие движења покажуваат дека со соодветни економски политики и макроекономска консолидација може да се влијае врз растот на трошоците за живот.

„Нашата цел е економскиот раст сè посилно да се претвора во подобри примања и поквалитетен живот за граѓаните“, истакна Мицкоски.

Во политичкиот дел од обраќањето, претседателот на Владата упати остри критики кон опозицијата, обвинувајќи ја дека нема визија и програма и дека наместо конкретни решенија користи навреди и манипулации.

Тој оцени дека опозициските партии ги оспоруваат економските резултати на Владата и дека нивната главна цел е враќање на власт.

Мицкоски ги обвини политичките противници и за претходни одлуки и договори кои, според него, биле на штета на граѓаните и државните интереси.

Во завршниот дел од обраќањето тој повторно се осврна на политичките разлики, нагласувајќи дека државата не смее да биде заложник на лични и партиски интереси.

Европска иднина, но без откажување од идентитетот и достоинството

Значаен дел од говорот Мицкоски посвети на европската интеграција и отворените прашања со источниот сосед, Бугарија.

Тој порача дека Македонија не бара посебен третман, туку еднаква почит и примена на европските принципи.

„Ние не бараме светот да се прилагодува на нас. Ние бараме да бидеме третирани со иста почит со која ние ги третираме останатите“, истакна претседателот на Владата.

Мицкоски нагласи дека Македонија нема да ја гради својата иднина врз омраза и непријателства, но нема ниту да се откаже од сопственото достоинство.

Според него, вистинското пријателство меѓу државите треба да се темели на заемна почит, а европската интеграција не смее да создава чувство на пораз или понижување.

„Достоинство не е предмет на преговарање. Сакаме европска иднина, силни сојузништва и пријателства, но со исправена глава. Македонскиот идентитет, јазик и историја се нашето наследство, нашата гордост и нашата обврска кон идните генерации“, порача Мицкоски.

Тој истакна дека Македонија и Бугарија ги поврзуваат соседството, историјата и заедничката иднина на регионот, но дека различните толкувања на минатото не треба да бидат пречка за соработка.

„Нашиот јазик не е пречка за европската иднина. Тој е дел од европското културно богатство. Нашиот идентитет не е проблем што треба да се реши, туку достоинство што треба да се почитува“, рече претседателот на Владата.

Тој додаде дека не бара Европа да избира меѓу Македонија и Бугарија, туку европските принципи да важат еднакво за сите.

Мицкоски порача дека идните генерации не треба да ја наследат недовербата од минатото, туку храброста за решавање на отворените прашања.

Во обраќањето, претседателот на Владата повика на надминување на политичките поделби и обединување околу големите стратешки цели.

Тој нагласи дека Македонија во следната деценија треба да спроведе значајни промени во економијата, инфраструктурата, образованието, здравството и институциите.

Според него, потребни се нови инвестиции, современо образование, силен здравствен систем и институции кои ќе им служат на граѓаните.

Мицкоски истакна дека државата мора да ги победи сиромаштијата, корупцијата, неправдата, поделбите и иселувањето.

„Нашата татковина е поголема од секоја партија и секоја влада. Политичките разлики не смеат да бидат посилни од заедничката одговорност. Потребно ни е национално единство околу големите стратешки цели“, порача тој.

Тој нагласи дека сегашната генерација има обврска да ја зачува државата, да ги зацврсти институциите и да создаде нови можности за идните генерации.

„Историјата нема да нè памети по зборовите, туку по делата“

Во завршницата од обраќањето, Мицкоски повторно се наврати на историското значење на 11 Октомври и на одговорноста на денешните генерации.

Тој посочи дека борците за слобода не знаеле дали ќе ја дочекаат победата, но верувале дека нивната жртва ќе обезбеди подобра иднина за народот.

„Историјата нема да нè памети по зборовите што сме ги изговориле. Ќе нè памети по делата што сме ги оставиле“, нагласи претседателот на Владата.

Според него, татковината не е само историско наследство, туку и секојдневна одговорност на работниците, земјоделците, наставниците, лекарите и сите граѓани кои придонесуваат за нејзиниот развој.

Тој порача дека 11 Октомври не треба да биде само ден на сеќавање, туку и потсетник на обврската секоја генерација да ја продолжи борбата за слобода, достоинство и подобар живот.

„Нашите предци ни ја оставија слободата. Нашите родители ни ја оставија независноста. А ние на нашите деца мора да им оставиме успешна држава!“, порача Мицкоски.

Претседателот на Владата го заврши обраќањето со порака за почит кон борците за слобода, честитајќи го 11 Октомври и повикувајќи на заедничка одговорност за иднината на Македонија.

Сузана Андоновиќ