Вести

Царината и Централниот регистар воведуваат електронска размена – без хартиени потврди за царински долг

Директорот на Царинската управа, Бобан Николовски, информира дека фирмите и граѓаните повеќе нема да имаат обврска да подигаат хартиени потврди за царински долг за упис или промени во Централниот регистар.

-Хартиените потврди за царински долг кои се потребни за упис и промени на правниот субјект во Централниот регистар стануваат минато. Централниот регистар со само еден клик ги добива овие податоци од Царинската управа електронски во реално време, што за фирмите и граѓаните значи заштеда на време и ресурси. Истовремено на овој начин овозможуваме безбедност, интегритет и точност на обезбедените податоци со што делуваме во насока на сузбивање на можни измами, кажа Николовски.

„Бизнисот нема време за чекање. Како институции сме должни да обезбедиме брзи и современи услуги. Со ваквите решенија градиме поефикасно и доверливо општество“

Со новиот систем, Централниот регистар во реално време електронски ги добива податоците од Царинската управа, што значи целосно укинување на досегашните хартиени потврди и значителна заштеда на време и ресурси.

Николовски посочи дека досега годишно се издаваа од седум до девет илјади вакви потврди, за чија обработка беа потребни пет до десет дена, што создаваше непотребен административен товар. „Од денес, граѓаните нема да треба да доаѓаат лично во Царината или да ангажираат адвокати за оваа услуга,“ информира Николовски.

Новата електронска размена обезбедува поголема безбедност, интегритет и точност на податоците, со што се намалуваат ризиците од можни злоупотреби.

„Бизнисот нема време за чекање. Како институции сме должни да обезбедиме брзи и современи услуги. Со ваквите решенија градиме поефикасно и доверливо општество,“ нагласи директорот Николовски.

Сузана Андоновиќ