Вести

Отворен ден во Основен суд Куманово, најголем проблем во моментов малку судии многу предмети

Основниот суд Куманово по повод Европски ден на граѓанска правда – 25 октомври, организираше отворен ден за граѓаните. Ученици од основни и средни училишта, адвокати, нотари, граѓани денес го посетија судот и директно разговараа со судиите и судската служба.

Судиите и вработените во судот одговараа на прашања на учениците кои се однесуваа на бројот на решени предмети и генерално за работата на судот.

Основниот суд Куманово е со проширена надлежност, постапува по сите видови предмети во граѓанска и кривична материја. По бројот на предмети и подрачјето кое го покрива и бројот на жителите во општините од североистокот овој суд е меѓу најголемите во државата, трет, веднаш по скопските, а според извештајот на Судскиот совет, Основниот суд Куманово последниве пет години е ажурен суд.

– Се соочуваме со недостиг на судии поради пензионирање и одлив на кадар. Судот согласно одлуката на судскиот совет треба да има 35 судии, а во моментов работиме со 18 судии и со еден судија од граѓански суд од Скопје кој е распределен на една година да ни помогне. Кандидати за судии за Куманово нема, последен избор за судии имавме пред 12 години, се поголем е бројот на предмети, а судии нема. Во прекршоци имаме само тројца судии, а еден судија има 1 000 предмети. Генерално покрај овој проблем ги покриваме потребите на граѓаните од регионот, изјави в.д.претседателката на Основен суд, Куманово, Снежана Манев.

Таа вели дека најголемиот проблем на Основен суд Куманово е мал број на судии, а голем број на предмети.

Судот по пожарот е целосно саниран, реконструирана е електрична енергија и вода, останува проблем со АКМИС систем кој не функционира на 55 отсто во судот и принудени сме да го користиме делот каде функционира. Се надеваме дека во скоро време ќе се обноват каблите и ќе работи во целиот суд, информираше Манев.

– Во пожар се изгорени само стари предмети, има формирано комисија во судот која има запишано што е изгорено во пожарот. Сите предмети од 2009 година се внесуваат во АКМИС систем каде електронски ги има сите предмети и документи.

Судската служба е добро покриена, недостигаат само дактилографи кои одат во пензија и се очекува да се добие дозвола за нови вработувања, наведуваат од Основниот суд Куманово.

Сузана Андоновиќ