Вести

Кумановското обвинителство ќе го преземе случајот со агресивното куче кое нападна осум лица

Основното јавно обвинителство ќе го преземе случајот со расното агресивно куче кое нападна четири деца и четворица возрасни лица во Куманово, информираше раководителот на Секторот за инспекциски надзор, Бобан Бојковски. Службите ќе утврдат кој е сопственикот на кучето, дали избегало или е напуштено.

Анализите од ветеринарно сточарскиот центар „Тодор Велков“ покажале дека не се работи за куче скитник, туку дека кучето е чувано од сопственик. Азијатот побегнал или е напуштен.

-Бараме да се изврши постапка на утврдување на сопственост за да се спречат вакви настани. Во последните два месеца немаме ваков случај и пријава за ваков вид случај, барањето го темелиме врз основа на тоа што се извршени сечење на уши и опаш со што укажува дека имало сопственик, изјави Бојковски.

Агресивното куче беше заловено и е сместено во прифатилиште во Четирце, сопственост на ветеринарно сточарскиот центар „Тодор Велков“. Осум лица побараа помош во болницата и го пријавија случајот во полицијата.

Сузана Андоновиќ