Вести

Истечените пасоши ќе важат до крајот на оваа година

Важноста на пасошите со истечен рок се продолжува до 31 декември 2021 година, соопшти Министерството за внатрешни работи.

„Во согласност со Законот за изменувањето и дополнувањето на Законот за патните исправи на државјаните на Република Северна Македонија, кој стапи во сила на 11.6.2021, а ќе почне со примена од 1.7.2021, важноста на пасошот, дипломатскиот пасош и службениот пасош, чиј рок на важење е истечен, односно истекува по 31 јули 2021 година, се продолжува до 31 декември 2021 година“, велат од МВР.

Од таму појаснуваат дека измената на Законот за патните исправи е направена со цел да им се излезе во пресрет на потребите на голем број наши граѓаните, кои поради пандемијата, рестриктивните мерки, карантините и другите отежнати услови во нашата земја, но и надвор од неа, во дијаспората, беа спречени навремено да си ги продолжат своите документи.