Вести
Димитриевски од денеска официјално нов градоначалник на Куманово -фото-
Максим Димитриевски од денеска и официјално ја презема функцијата градоначалник на Општина Куманово од неговиот претходник Зоран Дамјановски откако претседателот на Општинската изборна комисија Звонимир Николовски му го врачи уверението.
Димитриевски се заблагодари на сите за довербата, тој изјави дека очекува со реализација на планираните проекти, Куманово да добие урбан лик.
– Во иднина, сите изборни циклуси да се одвиваат како овој последниот што наликуваше на скандинавски тип на изборен процес и да поскам успех на сите избрани колеги советници во советот на општина Куманово, со желба да го реализираме она со кое што излеговме пред граѓаните во рамките на нашите политички програми и агенди, што ги ветивме во делот на очекувања кои што ги имаат граѓаните“-рече Димитреивски.
Дамјановски изрази надеж дека Димитриевски успешно ќе ја води Општината.
– Тој е успешен политичар, а сега има и добра Влада која првпат по 11 години е наклонета кон Општина Куманово и проектите што ги работиме му остануваат нему, а се во фаза на изградба. Се надевам дека 2018 година ќе биде многу продуктивна и дека Куманово ќе биде многу подруг град во однос на овие искушенија кои ги имаше во изминатиот период, рече Дамјановски и се заблагодари на граѓаните за трите мандати, потсетувајќи дека работел во период на, како што рече, искушенија и предизвици.
Димитриевски денеска оствари средба и со противкандидатите на локалните избори: Башким Османи од Алијанса на Албанците, Дритон Сулејмани од Движење Беса и Бесник Мемети од ДПА, кандидатот за градоначалник од ВМРО ДПМНЕ Зоран Ѓорѓиевски не дојде иако бил поканет на средбата.
Тројцата кандидати му честитаа за изборот и му посакаа успех на Димитриевски во натамошната работа и истакнаа дека се отворени за идни сугестии, предлози за подобар живот на граѓаните.
